General

9. ഹ്രീഹ്ലാദവും ജഞ്ജലിപ്പും (Hints)

ചോദ്യം:

ചോദ്യം ഇവിടെ.

ഉത്തരം:

സാധാരണ ഇവിടെ ഉത്തരം പറയുകയാണു പതിവു്.  അതിനു പകരം ഉത്തരം പടിപടിയായി വെളിവാക്കുന്ന ഒരു രീതി പരീക്ഷിക്കുകയാണു്.

ഏതാനും ദിവസങ്ങള്‍ കൊണ്ടു് സൂചനകള്‍ നല്‍കി കൂടുതല്‍ ‍പേരെ പങ്കെടുപ്പിക്കാന്‍ ഒരു ശ്രമം.

ഇതിന്റെ ഓരോ ഘട്ടത്തിലും ഉത്തരം കിട്ടുന്നവര്‍ കമന്റായി ചേര്‍ക്കുക.

ഇതൊരു തലകീഴായ രീതിയാണു്.  ഏറ്റവും അവസാനത്തെ കടമ്പ ഇതിന്റെ എറ്റവും ആദ്യത്തെ സ്റ്റെപ്പ് ആയിരിക്കും.  പൂര്‍ണ്ണമായ ഉത്തരം ഇതിന്റെ അവസാനം ചേര്‍ക്കാം.

കടമ്പ 0: തന്നിരിക്കുന്ന പ്രശ്നത്തിന്റെ ഉത്തരം കണ്ടുപിടിക്കുക.

ഇതാണു പ്രശ്നം.

സന്ദീപ് (കരിങ്കല്ലു്) ഉത്തരത്തിനു വളരെ അടുത്തെത്തി.  അതു പിന്നീടു പ്രസിദ്ധീകരിക്കാം.

ഇതു വളരെ ബുദ്ധിമുട്ടുള്ളതായി തോന്നുകയാല്‍ അടുത്ത കടമ്പയില്‍ അതിനെ ഒന്നു സരളമാക്കുന്നു. കടമ്പ 1 പൂര്‍ണ്ണമായി ചെയ്തു കഴിഞ്ഞാല്‍ അതില്‍ നിന്നു് ഇങ്ങോട്ടു വരുന്നതു് ആലോചിക്കാം.

കടമ്പ 1 (മാര്‍ച്ച് 6):

ഹ്രീഹ്ലാദം, ജഞ്ജലിപ്പു് എന്നതിനു പകരം അവര്‍ Yes, No എന്നു പറയുന്നു എന്നു കരുതുക.

മൂന്നു ചോദ്യത്തില്‍ അവരെ തിരിച്ചറിയാന്‍ പറ്റുമോ?

ഇതിന്റെ ഉത്തരം പൂര്‍ണ്ണമായി ആരും കണ്ടുപിടിച്ചിട്ടില്ല.  അതിനാല്‍ അടുത്ത കടമ്പ.  അതു കടന്നിട്ടു് ഇങ്ങോട്ടു വരാം.

കടമ്പ 2 (മാര്‍ച്ച് 7):

യാത്രാമൊഴിയെയോ വക്കാരിയെയോ കൃത്യമായി കണ്ടുപിടിച്ചാല്‍ പിന്നെ ഒരു ചോദ്യത്തില്‍ മൂന്നുപേരെയും കണ്ടുപിടിക്കാം എന്നു് ഇഞ്ചിപ്പെണ്ണു് ഇവിടെ നിരീക്ഷിക്കുന്നു.

ശരിയാണു്.  വേറൊരാളെ ചൂണ്ടിക്കാണിച്ചു് “ഇതു ചിത്രകാരനാണോ?” എന്നു ചോദിച്ചാല്‍ മതി.

  • യാത്രാമൊഴി Yes എന്നു പറഞ്ഞാല്‍ അതു ചിത്രകാരന്‍, മൂന്നാമത്തെ ആള്‍ വക്കാരി; No എന്നു പറഞ്ഞാല്‍ അതു വക്കാരി, മൂന്നാമത്തെ ആള്‍ ചിത്രകാരന്‍.
  • വക്കാരി Yes എന്നു പറഞ്ഞാല്‍ അതു യാത്രാമൊഴി, മൂന്നാമത്തെ ആള്‍ ചിത്രകാരന്‍; No എന്നു പറഞ്ഞാല്‍ അതു ചിത്രകാരന്‍, മൂന്നാമത്തെ ആള്‍ യാത്രാമൊഴി.

അതായതു്,  രണ്ടു ചോദ്യത്തില്‍ യാത്രാമൊഴിയെയോ വക്കാരിയെയോ കൃത്യമായി മനസ്സിലാക്കിയാല്‍ (ചിത്രകാരനെ മനസ്സിലാക്കിയിട്ടു വലിയ കാര്യമൊന്നുമില്ല. നേരായാലും അല്ലെങ്കിലും നേരേ ചൊവ്വേ ഉത്തരം പറയുന്നവനേ കിട്ടിയെങ്കിലേ കാര്യമുള്ളല്ലോ!) നമുക്കു് ഒന്നാം കടമ്പയും എളുപ്പത്തില്‍ കടക്കാം.

അടുത്ത കടമ്പ: രണ്ടേ രണ്ടു ചോദ്യത്തില്‍ യാത്രാമൊഴിയെയോ വക്കാരിയെയോ കൃത്യമായി മനസ്സിലാക്കണം. എങ്ങനെ?

ചിന്തിക്കുക. അടുത്ത കടമ്പയ്ക്കുള്ള സൂചന നാളെ.

(ഇത്രയും ചോദ്യത്തിന്റെ കമന്റുകളില്‍ത്തന്നെ പറഞ്ഞിരുന്നതാണു്. അതിനാല്‍ ഒരു ദിവസം കാത്തിരിക്കാതെ GMT ഉപയോഗിക്കുന്ന എന്റെ ബ്ലോഗ് അടുത്ത ദിവസത്തിലേക്കു കടന്നപ്പോള്‍ അടുത്ത കടമ്പയിലേക്കു കടക്കുന്നു.)

കടമ്പ 3 (മാര്‍ച്ച് 8 ):

യാത്രാമൊഴിയെയോ വക്കാരിയെയോ കൃത്യമായി രണ്ടു ചോദ്യത്തില്‍ തിരിച്ചറിഞ്ഞാല്‍ (മൂന്നു ചോദ്യം കൊണ്ടു ഇഞ്ചിപ്പെണ്ണു തിരിച്ചറിഞ്ഞു. പക്ഷേ, അതു പോരാ!) പിന്നെ ഒരു ചോദ്യം കൊണ്ടു് എല്ലാം ശരിയാക്കാം (ഹ്രീഹ്ലാദം/ജഞ്ജലിപ്പു് പ്രശ്നമില്ലെങ്കില്‍) എന്നു നാം മനസ്സിലാക്കി. ഇനി, അതിലേക്കു് എത്താനുള്ള വഴികള്‍ നോക്കാം.

നമുക്കു് ചിത്രകാരനല്ലാത്ത ഒരാളെ (അതായതു് യാത്രാമൊഴിയോ വക്കാരിയോ; ആരാണെന്നു് അറിയില്ല, പക്ഷേ ചിത്രകാരനല്ല എന്നറിയാം) ഒരു ചോദ്യം കൊണ്ടു കണ്ടുപിടിച്ചെന്നിരിക്കട്ടേ. അയാള്‍ യാത്രാമൊഴിയാണോ വക്കാരിയാണോ എന്നു് ഒരു ചോദ്യം കൊണ്ടു കണ്ടുപിടിക്കാമോ?

തീര്‍ച്ചയായും. “രണ്ടും രണ്ടും കൂട്ടിയാല്‍ നാലാണോ?” എന്നു ചോദിച്ചാല്‍ മതി. അല്ലെങ്കില്‍ ഇഞ്ചിപ്പെണ്ണു ചോദിച്ചതു പോലെ “സൂര്യന്‍ പടിഞ്ഞാറാണോ അസ്തമിക്കുന്നതു്?” എന്നു ചോദിച്ചാല്‍ മതി. യാത്രാമൊഴി Yes എന്നും വക്കാരി No എന്നും പറയും. (ഹ്രീഹ്ലാദം/ജഞ്ജലിപ്പു പ്രശ്നം കിടപ്പുണ്ടു്. അതു നമുക്കു പിന്നീടു നോക്കാം.)

അപ്പോള്‍,

അടുത്ത കടമ്പ: ഒരു ചോദ്യം കൊണ്ടു് (ഇതിനുത്തരം പറയുന്നതു് മൂന്നുപേരില്‍ ആരു വേണമെങ്കിലും ആവാം.) ചിത്രകാരനല്ല എന്നുറപ്പുള്ള ഒരാളെ കണ്ടുപിടിക്കാമോ?

ഇതിനുത്തരം കിട്ടിയാല്‍ നമ്മുടെ സരളപ്രശ്നത്തിന്റെ ഉത്തരമായി. പിന്നെ അതില്‍ ഹ്രീഹ്ലാദം/ജഞ്ജലിപ്പു പ്രശ്നത്തെ ചേര്‍ത്താല്‍ മതി.

ചിന്തിക്കുക. അടുത്ത കടമ്പയ്ക്കുള്ള സൂചന നാളെ.

കടമ്പ 4 (മാര്‍ച്ച് 9 ): 

മൂന്നു സന്യാസിമാര്‍ A, B, C എന്നിവരാണെന്നു വെയ്ക്കുക.  ഒരു ചോദ്യം ഒരാളോടു മാത്രം ചോദിച്ചിട്ടു് ചിത്രകാരനല്ലാത്ത ഒരാളെ കണ്ടുപിടിക്കണം. 

ചിത്രകാരനല്ലാത്തയാളെ കണ്ടുപിടിക്കാന്‍ പല വഴികളുണ്ടു്. രണ്ടെണ്ണം താഴെ:

  1. ഞാന്‍ കണ്ടുപിടിച്ച ചോദ്യം ഇതായിരുന്നു: A-യോടു ചോദിക്കുക.

    “നിങ്ങള്‍ യാത്രാമൊഴിയാണു്”, (B-യെ ചൂണ്ടിക്കാണിച്ചിട്ടു്) “ഇയാള്‍ ചിത്രകാരനാണു്” എന്നീ പ്രസ്താവനകളില്‍ ഒന്നു ശരിയും മറ്റേതു തെറ്റും ആണോ?

    ഇതിനുത്തരം Yes എന്നാണെങ്കില്‍ B ചിത്രകാരനല്ല, No എന്നാണെങ്കില്‍ C ചിത്രകാരനല്ല.

  2. VK സജിത്തിന്റെ ചോദ്യം മറ്റൊന്നായിരുന്നു. A-യോടു തന്നെ ചോദിക്കുക:

    (B-യെ ചൂണ്ടിക്കാണിച്ചിട്ടു്) “ഇയാള്‍ ചിത്രകാരനാണോ എന്നു് നിങ്ങളും ചിത്രകാരനുമല്ലാത്ത മൂന്നാമത്തെ ആളോടു ചോദിച്ചാല്‍ അയാള്‍ Yes എന്നു പറയുമോ?”

    ഇതിനുത്തരം Yes എന്നാണെങ്കില്‍ B ചിത്രകാരനല്ല, No എന്നു പറഞ്ഞാല്‍ C ചിത്രകാരനല്ല.

രണ്ടു ചോദ്യത്തിലും A ചിത്രകാരനാണെങ്കില്‍ പിന്നെ B-യും C-യും ചിത്രകാരനല്ല എന്നു പ്രത്യേകിച്ചു പറയേണ്ട കാര്യമില്ലല്ലോ. അപ്പോള്‍ അദ്ദേഹം എന്തുത്തരം വേണമെങ്കിലും പറഞ്ഞോട്ടേ.

A ചിത്രകാരനല്ലെങ്കില്‍ ഇതെങ്ങനെ ശരിയാകുന്നു എന്നു താഴെക്കൊടുത്തിരിക്കുന്ന ടേബിള്‍ നോക്കുക. എന്റെ ചോദ്യത്തിന്റെ ഉത്തരങ്ങള്‍ ഇങ്ങനെ വരാം.

A B C പ്രസ്താവനകള്‍ ശരി ഉത്തരം A-യുടെ ഉത്തരം
യാത്രാമൊഴി വക്കാരി ചിത്രകാരന്‍ TF  Yes  Yes 
യാത്രാമൊഴി ചിത്രകാരന്‍ വക്കാരി TT No No
വക്കാരി യാത്രാമൊഴി ചിത്രകാരന്‍ FF  0 No Yes 
വക്കാരി ചിത്രകാരന്‍ യാത്രാമൊഴി FT Yes  No


സജിത്തിന്റെ ചോദ്യത്തിന്റെ ഉത്തരങ്ങളും ഇങ്ങനെ തന്നെ. ടേബിള്‍ അല്‍പം മാറും, അത്ര
തന്നെ.

A B C B ചിത്രകാരന്‍?  മൂന്നാമന്‍  മൂന്നാമന്റെ ഉത്തരം A-യുടെ ഉത്തരം
യാത്രാമൊഴി വക്കാരി ചിത്രകാരന്‍ No   വക്കാരി Yes  Yes 
യാത്രാമൊഴി ചിത്രകാരന്‍ വക്കാരി Yes  വക്കാരി No No
വക്കാരി യാത്രാമൊഴി ചിത്രകാരന്‍ No  യാത്രാമൊഴി No Yes 
വക്കാരി ചിത്രകാരന്‍ യാത്രാമൊഴി Yes യാത്രാമൊഴി Yes  No

 

സരളമായ ചോദ്യത്തിന്റെ ഉത്തരം:

സന്ന്യാസിമാര്‍ Yes, No ഇവ പറഞ്ഞാല്‍ നമുക്കിപ്പോള്‍ ആളുകളെ മൂന്നു ചോദ്യത്തില്‍
കണ്ടുപിടിക്കാം.

ചോദ്യം ഒന്നു്: ഒരാളോടു് എന്റെയോ സജിത്തിന്റെയോ ചോദ്യം ചോദിക്കുക. ഉത്തരം Yes ആണെങ്കില്‍ C-യോടും No ആണെങ്കില്‍ B-യോടുമാണു് അടുത്ത ചോദ്യം ചോദിക്കേണ്ടതു്.

ചോദ്യം രണ്ടു്: രണ്ടും രണ്ടും കൂട്ടിയാല്‍ നാലു കിട്ടുമോ? ഉത്തരം Yes ആണെങ്കില്‍ ഇയാള്‍ യാത്രാമൊഴി, No ആണെങ്കില്‍ വക്കാരി.

അയാളോടു തന്നെ ചോദ്യം മൂന്നു്: A ചിത്രകാരനാണോ? പറയുന്നതു യാത്രമൊഴിയാണോ
വക്കാരിയാണോ എന്നു നമുക്കറിയാവുന്നതുകൊണ്ടു് ഉത്തരത്തില്‍ നിന്നു് എല്ലാവരെയും കണ്ടുപിടിക്കാം.

ഇനി നമുക്കു ഗഹനമായ ഉത്തരത്തിലേക്കു കടക്കാം.

അടുത്ത കടമ്പ: Yes, No എന്നിവയ്ക്കു പകരം അവര്‍ ഹ്രീഹ്ലാദം, ജഞ്ജലിപ്പു് എന്നിവയാണു പറയുന്നതെങ്കില്‍ (അവയുടെ അര്‍ത്ഥം നമുക്കറിയില്ല) എങ്ങനെ ഇവരെ കണ്ടുപിടിക്കും? (പ്രത്യേകം ശ്രദ്ധിക്കുക: ആ വാക്കുകളുടെ അര്‍ത്ഥം കൂടി നമുക്കു കണ്ടുപിടിക്കാന്‍ സാധിക്കില്ല. അവ കണ്ടുപിടിക്കാതെ തന്നെ ഇതു ചെയ്യുക.)

ഉത്തരം ഇവിടെ.

General

Comments (18)

Permalink

ബുദ്ധിപരീക്ഷകള്‍ക്കൊരു ബ്ലോഗ്

ബുദ്ധിപരീക്ഷകള്‍ക്കൊരു ബ്ലോഗ് തുടങ്ങുകയാണു്.

“പരീക്ഷ” എന്നൊക്കെ ശീര്‍ഷകത്തിലുണ്ടെങ്കിലും ഇതൊരു മത്സരമല്ല. വെറുതേ ചോദ്യങ്ങളും ഉത്തരങ്ങളും കൊടുക്കുന്നതിനു പകരം, യുക്തി ഉപയോഗിച്ചു് എങ്ങനെ ഉത്തരത്തിലെത്താം എന്നുള്ള വിശദീകരണവും ചേര്‍ക്കണം എന്നാണു് ഒരു പ്രധാന ഉദ്ദേശ്യം.

ഒരു ഉത്തരം കിട്ടിയാല്‍ ഒരു പോസ്റ്റ് അടച്ചുപൂട്ടുന്നില്ല. ചില ചോദ്യങ്ങള്‍ക്കു് ഒന്നില്‍കൂടുതല്‍ ഉത്തരങ്ങളുണ്ടാവാം. ചില ഉത്തരങ്ങള്‍ ഒരു പക്ഷേ ഇതു വരെ ആരും കണ്ടുപിടിക്കാത്തതാവാം. ചിലപ്പോള്‍ പ്രസിദ്ധമായ ഉത്തരങ്ങളെക്കാള്‍ സരളമായവ ആരെങ്കിലും കണ്ടുപിടിച്ചേക്കാം.

ഇവയൊക്കെ സമാഹരിച്ചു് ഒരു റെഫറന്‍സായി സൂക്ഷിക്കുക എന്നതാണു് ഈ ബ്ലോഗിന്റെ ലക്ഷ്യം. ഇതിലെ ഓരോ പോസ്റ്റും വീണ്ടും വീണ്ടും മാറ്റങ്ങള്‍ വന്നുകൊണ്ടിരിക്കുന്നതായിരിക്കും.

ബ്ലോഗിന്റെ ഈ സ്വഭാവത്തോടൊപ്പം, പ്രശ്നങ്ങള്‍ നിര്‍ദ്ധരിക്കാനുള്ള ആളുകളുടെ അഭിരുചിയെ വര്‍ദ്ധിപ്പിക്കാന്‍ താഴെപ്പറയുന്ന കാര്യങ്ങള്‍ കൂടി ചെയ്യുന്നു.

  1. എല്ലാ കമന്റുകളും moderated ആയിരിക്കും. എന്റെയോ മറ്റേതെങ്കിലും മോഡരേറ്റരുടെയോ അംഗീകാരത്തിനു ശേഷമേ കമന്റുകള്‍ സാമാന്യജനത്തിനു കാണാന്‍ സാധിക്കുകയുള്ളൂ. അതിനാല്‍ കമന്റുകള്‍ ഉടനേ കാണാന്‍ പറ്റില്ല. ദയവായി ഒന്നില്‍ക്കൂടുതല്‍ തവണ ഒന്നു തന്നെ ഇടാതിരിക്കുക.

    നേരത്തെ ഇട്ട കമന്റുകള്‍ മാറ്റണമെങ്കിലും ഒരു കമന്റിട്ടാല്‍ മതി.

  2. ഓരോ പ്രശ്നത്തിനും ആദ്യം ചോദ്യം മാത്രമായി ഒരു പോസ്റ്റുണ്ടാവും. ഉത്തരം പറയാതെ ആ പോസ്റ്റ് ഒരാഴ്ചയെങ്കിലും ഉണ്ടായിരിക്കും.
  3. ഈ ഒരാഴ്ച (സമയപരിമിതിയനുസരിച്ചു് ഇതു കൂടാം.) വായനക്കാര്‍ക്കു് ഉത്തരങ്ങള്‍ കമന്റുകളായി ഇടാം. കഴിയുമെങ്കില്‍ എങ്ങനെ ഉത്തരം കണ്ടുപിടിക്കാം എന്നു വിശദമായി എഴുതുക.
  4. ഉത്തരം മറ്റൊരു പോസ്റ്റായി പ്രസിദ്ധീകരിക്കും. പല ഉത്തരങ്ങളും ഉത്തരത്തിലെത്തിച്ചേരാന്‍ പല വഴികളുമുണ്ടെങ്കില്‍ അവയും പ്രസിദ്ധീകരിക്കും. പ്രസിദ്ധീകരണയോഗ്യമായ ഫലിതം കലര്‍ന്ന ഉത്തരങ്ങളും പ്രസിദ്ധീകരിക്കും. ഉത്തരങ്ങള്‍ അയച്ചവരുടെ പേരുകളും ഉണ്ടാവും. ആര്‍ക്കും സമ്മാനമൊന്നും കൊടുക്കുന്നതല്ല.

ഗുരുകുലത്തില്‍ ഇതിനെപ്പറ്റി പറഞ്ഞു് ഇട്ടിരുന്ന പോസ്റ്റില്‍ ചോദിച്ച രണ്ടു ചോദ്യങ്ങളുടെ ഉത്തരങ്ങളും പ്രസിദ്ധീകരിച്ചിട്ടുണ്ടു്.

പുതിയതായി രണ്ടു പ്രശ്നങ്ങള്‍ നിങ്ങള്‍ക്കു ചെയ്യാനായി പ്രസിദ്ധീകരിച്ചിട്ടുമുണ്ടു്.


സൈഡ്‌ബാറിലെ “പുതിയ ചോദ്യങ്ങള്‍” എന്ന ലിങ്കില്‍ പോയാല്‍ നിങ്ങള്‍ക്കു് ഉത്തരമയയ്ക്കാവുന്ന ചോദ്യങ്ങള്‍ വായിക്കാം. ഒന്നോ രണ്ടോ മാത്രമേ കാണുകയുള്ളൂ ഒരു സമയം.

പഴയ ചോദ്യങ്ങള്‍” എന്ന ലിങ്കില്‍ പോയാല്‍ മുമ്പു പ്രസിദ്ധീകരിച്ച ചോദ്യങ്ങള്‍ വായിക്കാം. ഉത്തരം കാണാതെ പ്രശ്നങ്ങള്‍ നിര്‍ദ്ധരിക്കാന്‍ ആഗ്രഹമുള്ളവര്‍ക്കു് അവിടെ പോകാം.

പഴയ ഉത്തരങ്ങള്‍” എന്ന ലിങ്കില്‍ പോയാല്‍ മുമ്പു പ്രസിദ്ധീകരിച്ച പ്രശ്നങ്ങളുടെ ഉത്തരങ്ങള്‍ വായിക്കാം.

വിഷയമനുസരിച്ചു പഴയ പ്രശ്നങ്ങളെ പല വിഭാഗങ്ങളാക്കിയിട്ടുണ്ടു്. പ്രശ്നങ്ങളെ വിഭാഗമനുസരിച്ചു വായിക്കാന്‍ “All posts-categorywise” എന്ന ലിങ്കു സന്ദര്‍ശിക്കുക.

General

Comments (1)

Permalink